Martin Kadinda Mbioni kuitambulisha ‘Supremacy’ kimataifa

Mwezi mmoja tangu atambulishe toleo jipya la mavazi ‘Supremacy’ mbunifu wa mitindo nchini Martin Kadinda yuko mbioni kuanza ziara aliyoipa jina la Boda to Boda, kutambulisha toleo hilo kimataifa.

Akizungumza na Mwananchi jana, Kadinda aliyetamba miaka miwili nyuma na toleo la ‘six button’, alisema ziara hiyo itaitwa Boda to Boda, na mpaka sasa ameshapata mwaliko katika nchi mbili ambazo ataenda kutambulisha toleo hilo wiki chache zijazo.

“Boda to Boda ni programu nitakayozunguka nayo nchi mbalimbali kwa ajili ya kuonyesha kazi zangu mpya zitakazotambulika kama ‘supremacy.’ Mpaka sasa nimeshapata mwaliko kutoka nchi ya Kenya na Zambia. Hii imekuja  baada ya vazi langu la ‘six button’ kufanya vizuri ndani  na nje ya nchi,” alisema Kadinda.

Hata hivyo Kadinda ziara zake pia itategemea na mwaliko katika nchi husika kwani hatoweza kutembelea kila nchi.

“Nina mikakati ya kufika Bara la Ulaya na Marekani lakini itategemea mwaliko kwani siwezi kuifanya programu hii bila wenyeji.”

Alisema toleo hilo jipya litakuwa maalumu kwa wanaume pekee ambapo kutakuwa na aina tofauti za mavazi yaliyojulikana kwa jina hilo.

“Ndani ya ‘Supremacy’ utakutana na ‘Kwachukwachu Shirt’, triples na dry show haya ni mashati yenye rangi mbalimbali za kupendeza lakini yatakayokuwa yakiutambulisha Uafrika zaidi, lakini pia na nguo za aina nyingine. Nimeonelea kutengeneza mavazi ya wanaume pekee, kutokana na ukweli kwamba hawa hawana mitindo mingi kama ilivyo kwa wanawake, hata hivyo yatawahusu wanaume wajanja, kwani yanakwenda na wakati,” alisema Kadinda.

Alisema toleo hilo, litajumuisha nguo mbalimbali za kiume zenye umaridadi kuanzia rangi, mpaka aina ya ushonaji wake.

“Nguo zinazotengenezwa na Martin Kadinda zitazingatia ubora kuanzia kwenye rangi mpaka aina ya ushonaji wake kwani hazitafanana na toleo lolote lile lililowahi kutengenezwa na wabunifu wa ndani na nje ya nchi. Itakuwa ya kipekee kama ilivyokuwa ‘six button’,” alisema Kadinda.

Alisema katika soko lake kwa mwaka huu, amewalenga Watanzania wa kawaida. “Hili ni soko kwa ajili ya Watanzania wa kawaida sana, nimeanza kusambaza mzigo hapa nchini na sasa ninaanza kuitangaza kimataifa.”