OFISA Uhamiaji katika Uwanja wa Ndege wa Kimataifa wa
Kilimanjaro (KIA), SGT Stanslausi Zacharia (37), anatuhumiwa kumtolea
lugha chafu za matusi Rais Jakaya Kikwete.
Kwa mujibu wa chanzo chetu ndani ya Jeshi la Polisi, ofisa huyo
alimtolea lugha ya matusi Rais Kikwete, Oktoba Mosi mwaka huu, eneo la
Kwa Wasomali nje kidogo ya mji wa Bomang’ombe wilayani Hai.
Kabla, ofisa huyo anadaiwa kumtolea lugha ya matusi mhudumu wa baa
moja katika eneo hilo ijulikanayo kama G.5 baada ya kuwasilisha bili ya
vinywaji ambavyo alikuwa amekunywa na marafiki zake.
Taarifa zinadai kuwa baada ya kumtolea matusi ya nguoni mhudumu,
ofisa huyo aliendelea kutoa matusi hadi kwa Rais Kikwete, tukio ambalo
liliwakera wananchi na kutoa taarifa kituo kikuu cha polisi cha
Bomang’ombe kisha akatiwa mbaroni.
Baada ya kukamatwa, alishikiliwa kwa siku mbili kwa mahojiano kisha
jeshi hilo mkoani Kilimanjaro lilitoa rai kwa Idara ya Uhamiaji mkoa
kumchukulia hatua za kinidhamu ofisa wake.
Ofisa huyo tayari amefunguliwa jalada la uchunguzi namba
BNG/IR/3498/2013 katika kituo hicho cha Bomang’ombe kwa kosa la kutoa
lugha ya matusi, lakini suala hilo limefanywa siri na mamlaka husika.
Alipoulizwa Mkuu wa Uhamiaji Mkoa wa Kilimanjaro, Johanes Msumule,
licha ya kukiri kutokea aliomba lisiandikwe kwenye vyombo vya habari
kwa kile alichodai watalitolea taarifa siku za usoni.
Akizungumza na Tanzania Daima mwishoni mwa wiki, Msumule alisema kuwa
suala hilo wanalifanyia kazi kwa mapana na marefu, na kwamba tayari
yuko jijini Dar es Salaam kikazi kwa ajili ya kulishughulikia.
Source:- Tanzania Daima
Source:- Tanzania Daima
