UNAWEZA kuanzisha kitu chochote, wakati wowote lakini jambo la msingi
zaidi ni namna ya kudumisha na kuendeleza ulichokianzisha. Kwa mfano,
unaweza kufungua biashara fulani lakini ukafeli katika kuisimamia na
kufuja fedha, hutafanikiwa!
Marafiki
zangu, ndivyo ilivyo hata kwenye uhusiano. Unaanzisha sawa, lakini vipi
kuhusu kudumisha penzi lako likaendelea kuwa na nguvu zaidi siku hadi
siku? Hilo ndilo somo tunaloendelea kulijadili hapa kwenye Let’s Talk
About Love.
Kama mtakumbuka vizuri, wiki iliyopita nilianza kwa kufafanua namna
ya kutambua thamani na kuithamini. Bila kujua thamani yako wewe kwanza,
kujithamini na kumuona mwenzi wako ni wa muhimu kwako, hutaweza
kudumisha penzi lako.
Hebu sasa tuendelee kujifunza katika vipengele vingine marafiki zangu.
MHESHIMU
Mwanaume anapenda sana kuheshimiwa na
mpenzi wake. Kwa kawaida, mwanaume akigundua haheshimiwi au unafanya
hivyo kwa kumridhisha tu na si kutoka moyoni, ni rahisi kukuacha.
Kama
kichwa cha familia, lazima apewe nafasi ya kutoa uamuzi tangu mapema.
Ikiwa utakuwa na majibu mabaya kwake, huonyeshi heshima ni wazi kwamba
atakuacha mapema, maana utakuwa umepoteza sifa za kuwa mama wa familia.
KUWA MFARIJI WAKE
Siku hazifanani, hivyo
inawezekana kabisa siku moja mwenzi akawa na matatizo aidha ya kiakili,
kimaisha au kikazi. Ikitokea umegundua mpenzi wako ana matatizo na hana
furaha, wewe ndiyo unatakiwa kuwa mfariji wake.
Lazima umsome, ujue
yukoje ili iwe rahisi kugundua tofauti atakayokuwa nayo siku akiwa
hayupo sawa. Kumfariji ni jukumu lako, utakuwa umeonesha uwezo wako
kikamilifu wa kuwa mama bora hapo baadaye.
Mama ambaye anaweza kurudisha amani ya mume wake, pindi inapokuwa
mashakani. Ni mambo yanayowezekana kabisa marafiki zangu. Lazima ujipe
umuhimu kwa mwenzako. Akikaa afikirie na kuona kuwa kweli wewe ni muhimu
katika maisha yake.
Aone kuna ulazima wa kuharakia ndoa mapema kwa sababu utakuwa
umemjengea imani ya moja kwa moja. Huo ndiyo ukweli marafiki zangu.
Ikiwa kinyume cha hapo, ni kwamba utakuwa unajiondoa mwenyewe kwenye
sifa ya kuwa mke sahihi.
KAULI
Inakupasa uwe na ulimi mtamu. Simaanishi
uuweke sukari ili uwe mtamu; hapa nazungumzia juu ya kauli njema.
Hutakiwi kuwa na majibu ya hovyo kwa mwenzako, uzungumze kwa staha na
heshima. Hapo utakuwa unaingia moja kwa moja kwenye nafasi ya kuwa mke.
Wale wa mitaani, wanasikiliza maneno ya hovyo kutoka kwa marafiki zao
ndiyo wanaoweza kuwa na lugha chafu kwa wenzao. Kauli mbaya hukuondolea
sifa ya ustaarabu na moja kwa moja unajiweka pembeni mwenyewe. Nani
atapenda kuwa na mtu ambaye hajiheshimu? Ana majibu mabaya? Hajali
kinachotoka kinywani mwake? Ni nani?
ACHANA NA MAKUNDI
Mwanamke mwenye staha
hafungamani na makundi ya mashangingi wa mjini. Wanaume hasa wanaotaka
kuoa, hawapendi mke mtarajiwa awe shangingi au anayejihusisha na
wanawake wa aina hiyo.
Inaaminika kwamba kwenye makundi hayo hujadiliwa mambo yasiyofaa
ndiyo maana wanaume wengi hawapendi wanawake wenye tabia za kukaa kwenye
makundi ya mashangingi. Chukua hii kwa faida yako.
-GPL
